Төв аймгийн Мөнгөнморьт сумын Байдлаг багийн иргэн Аймгийн хошой аварга малчин, Багануур, Бага Хэнтий бүсийн Алдарт уяач Өлзийгийн Буяннэмэх удам залгасан уяач, малчин залуу даа. Өвөг эцэг нь манай сумын Дэлгэржавхлант нэгдэлийг анх байгуулж анхны даргаар нь ажиллаж явсан Агын буриад Доржийн Содном гэж баавай байжээ. "Алтан Унага"-ны эзний аав нь аймаг, сумын аварга адуучин алдарт "Үүлэн бор"-н төл Бор азаргаа Төв аймгийн түүхт 70 н жилийн ойгоор алдарт Маарийн хээр азаргатай ач тач уралдуулан аман хүзүүнд хурдлуулж явсан Аймгийн алдарт уяач адууны хиймортой эр хүн байлаа. Эмээ ээж нь Ардын Их Хурлын депутат, аймгийн 2 удаагийн депутат, сумын 3 удаагийн депутат Хөдөлмөрийн гавъяаны улаан тугын одон, Алтангадас одонт алдарт саальчин Цэдэн Ишийн Гунгармаа гэж буянтай буурал байсаан. "Алтан Унага"-ны эзний ээж нь Алтангадас одонт саальчин Намсрайн Хоролсүрэн гэж хүүгээрээ бахархаж үнэтэй сургаалаа хэлсэн сайхан ээж байна даа. Гурван үеэрээ сум орон нутгийнхаа нийгэм эдийн засгийн гол салбар болох хөдөө аж ахуй, мал аж ахуйн салбарт ажиллаж хөдөлмөрлөж яваа эрхэм хүмүүсээр бахархаж байлаа. Улсын аварга малчны болзол хангаж, малчны дээд цолонд хүрч "МӨНГӨНМОРЬТЫН ЦУУТ" хүмүүн болохын ерөөл өргөе.